Lev 9 | NdeIBE | STEP | Ngosuku lwesificaminwemibili uMosi wabiza u-Aroni kanye lamadodana akhe labadala bako-Israyeli.

Leviticus 9

Abaphristi baqala umsebenzi wabo

1 Ngosuku lwesificaminwemibili uMosi wabiza u-Aroni kanye lamadodana akhe labadala bako-Israyeli. 2 Wathi ku-Aroni, ‘Thatha iguqa lenkunzi elingelasici libe ngumnikelo wesono lenqama engelasici ibe ngumnikelo wokutshiswa, ukwethule phambi kukaJehova.

3 Ube usutshela abako-Israyeli uthi: ‘Thathani imbuzi enduna ibe ngumnikelo wesono, ithole lezinyane – kokubili kungokulomnyaka owodwa njalo kungela sici – kube ngumnikelo wokutshiswa, 4 uthathe inkabi kanye lenqama kube ngumnikelo wobudlelwano oba ngumhlatshelo phambi kukaJehova, ndawonye lomnikelo wamabele ohlanganiswe lamafutha, ngoba uJehova uzabonakala kuwe lamhlanje.’ ”

5 Bathatha izinto lezo uMosi ayelaye ngazo bazisa phambi kweThente lokuHlanganela, kwathi ibandla lonke lasondela eduze lema phambi kuka Jehova. 6 UMosi wasesithi, “Lokhu yikho uJehova alaye ukuthi likwenze, ukuze inkazimulo kaJehova ibonakale kini.”

7 UMosi wathi ku-Aroni, “Woza e-alithareni uzonikela umhlatshelo wesono sakho kanye lomnikelo wakho wokutshiswa wenzele wena kanye labantu indlela yokubuyisana. Nikela umhlatshelo wabantu ubenzele uxolo njengalokhu okulaywe nguJehova.”

8 Ngakho u-Aroni weza e-alithareni wahlaba ithole laba ngumnikelo wakhe wesono.

9 Amadodana akhe aletha igazi kuye wasegxumuza umunwe wakhe egazini waninda ngalo impondo ze-alithare. 10 E-alithereni watshisa amahwahwa, izinso kanye lalokhu okwembese isibindi kungokomnikelo wesono, njengalokhu uJehova ayekuyale uMosi;

11 inyama kanye lesikhumba wakutshisela ngaphandle kwezihonqo. 12 Wasehlaba umnikelo wokutshiswa. Amadodana akhe amnika igazi, waselichela inxa zonke ze-alithare.

13 Bamupha umnikelo wokutshiswa isitho ngesitho kugoqela inhloko, wasekutshisela ealithareni.

14 Wagezisa ezangaphakathi kanye lemilenze wasekutshisela phezu komnikelo wokutshiswa e-alithareni.

15 U-Aroni waseletha umnikelo owawungowabantu, wathatha imbuzi eyayingeyomnikelo wesono wayihlaba, waseyinikela yaba ngumnikelo wesono njengalokhu ayekwenze ngeyakuqala.

16 Waletha umnikelo wokutshiswa wawunikela ngendlela emisiweyo. 17 Waletha njalo umnikelo wamabele, wacupha ngesandla wasewutshisela e-alithareni phezu kwalowo owokutshiswa ayewunikele ekuseni.

18 Wahlaba inkabi kanye lenqama kwaba ngumnikelo wobudlelwano ebantwini. Amadodana akhe amnika igazi, waselichela inxa zonke e-alithareni. 19 Kodwa kwathi amahwahwa enkabi lawenqama – lomsila ononileyo, idanga, izinso, lalokhu okwembesa isibindi – 20 lokhu bakwendlala phezu kwesifuba, u-Aroni wasetshisela amahwahwa ealithareni.

21 U-Aroni wazunguza izifuba kanye lomlenze kwesokudla phambi kuka Jehova njengomnikelo wokuzunguza izifuba kanye lomlenze wakwesokudla phambi kukaJehova njengomnikelo wokuzunguza, njengalokhu okwalaywa nguMosi.

22 U-Aroni wasephakamisela izandla zakhe ebantwini wababusisa. Kwathi esenikele ngomhlatshelo womnikelo wesono, wobudlelwano, wahlala phansi.

23 UMosi lo-Aroni basebesiyangena eThenteni lokuHlanganela. Bathi bephuma, babusisa abantu; inkazimulo kaJehova yabonakala kubo bonke abantu. 24 Kwavela umlilo lapho ngoba uJehova wayekhona kwatsha umnikelo wokutshiswa kanye lamahwahwa e-alithareni. Abantu bonke bathi bebona lokho, bamemeza ngentokozo bathi mbo phansi ngobuso.